كنت بقري في روايه (11 دقيقه)لباولو كويليو ولقيت مقطع أثر فيا جدا وحسيت انه بيتكلم عني
( يستسلمون دون تفكير للشغف, أملين أن يجدوا فيه الحل لجميع مشكلاتهم, يوكلون الأخر الى أمر اسعادهم ويحفلونه أيضا وزر تعاستهم . هم أما فى حالة أغتباط لأنهم يشعرون أن شيئا رائعا يحصل لهم, واما فى حالة أحباط لأن هذا الحدث غير المتوقع الذى حل بهم دمر لديهم كل بارقة من الأمل)
- انا فعلا كنت كده بستسلم للشغف او بمعني ادق للاعتماديه علي الغير كنت بحس بنفسي من خلال اللي قدامي كنت بحس بقيمتي وبحب نفسي لما حد يقولي انت حد كويس او انت استيالك حلوكل ده او اني مسؤل عن الشخص ده في كل حاجه في حياته سواء كان زعلان او عنده مشكله كنت بحس اني لازم اكون في حياته .
- بس بعد فتره ابتديت احس ان فيه حاجه غلط في العلاقه مع اي كان دايما العلاقه بتفشل (انا بقصد بالعلاقه الاعتماديه )كنت بعدها بحس اني زي الجبل اللي انهار ومحدش حاسس بيا او اني عامل زي ضلي اللي ماشي الكل بيدوس عليه محدش حاسس بوجودي .
- بس دلوقتي الوضع اختلف كتير في بدايه العلاج كنت عنيف مع اللي حواليا كنت هبقي اعتمادي عكسي بمعني اني أبعد عن الناس وبحس اني لما هكون لوحدي كده هيبقي عندي اتزان داخلي بس بعد فتره لقيت ان كده كمان غلط ابتديت اعامل الكل واحدمفيش حد احسن من التاني عندي وبقيت أدرب علي اني اشوف نفسي من جوه بمعني أصح احب نفسي والعلاج ساعدني كتير بقالي 7 شهور مش اعتمادي علي حد وفي خلال الفتره دي لما ابتديت احس اني هدخل في اعتماديه كنت بشوف الارباح والخساير من علاقه الاعتماديه وبلاقي دايما الخساير اكتر واني مش بتقدم فكنت برفضها دايما
- امبارح في الجروب صديق قال جمله أثرت فيا اوي اني لما بشوف ان الحاجه الغلط هضرني ليه بعملها ما انا ابعد عنها احسن وكلامه صح فعلا
انا كنت اعتمادي ولسه طفلي الداخلي منضجش بس دلوقتي بحس انه ابتدي يفهمني ويساعدني وابتديت احب نفسي واتقبلها الحمد لله
هناك 8 تعليقات:
أنا مبسوط بكلامك ده جدا
ياعزيزى لأنه بيدل على تقدمك وأنا متشجع بيك .وكل الناس عندها إعتماديه بس لما بتزيد عن حد معين بتكون مرض.أنا عن نفسى ساعات بحس فى مواقف إنى إعتمادى وكنت زمان شويه كانت عندى الاعتماديه بدرجه مرضيه لكن الحمد لله قدرت أتخلص منها الحمد لله
يا عزيزى عندما تحتاج الثناء إثنى على نفسك به من خلال أعمالك إذا كنت راضى عنها.... :) فلن تحتاج الثناء من أحد
روعة.. روعة.. بصيرتك ثاقبة جداً يا محمود. إلى الأمام في طريق النضوج.
روعة. روعة.. بصيرتك ثاقبة. إلى الأمام في مسيرة النضوج يا صديقي.
و جول و جول و جول ... بجد تحياتى ارفع لك القبعة، اللى وصلتله حلووو اوى. انا بجد مبسوطة علشانك يا محمود و مبسوطة اكتر انك وصلت للنتائج ديه فى الوقت القصير ده.
انا قضيت 15 عاماً لأكتشف هذه الحقائق، طول عمرى اعتمادية و لما قررت ان اكون لا اعتمادية تطرفت و اصبحت شخصية قاسية جداً و بنيت حواجز بينى و بين الآخرين اعتقاداً منى ان هذا هو الحل. و كانت المفاجأة عندما وجدت نفسى انهار و ارجع بكل قوة للحالة الأولى الضعيفة حتى انتهى بى الأمر الى علاقة مثلية كادت ان تقتلنى.
عندما بدأت التعافى ادركت ما هى الاعتمادية و فهمت كل ما كنت فيه.
الآن توقعاتى من نفسى منطقية لا انتظر ان اصبح فى يوم من الايام غير اعتمادية لأن هذا لن يحدث لكن كما قلت انك بتحسبها و تسطيع ان ترى و "تقفش نفسك" و هذا ما يحدث معى.
بجد سعيدة جداً بيك. دا انت كمان مثقف و بتقرا لباولو كويليو. احييك واتمنى لك مزيد من الابصار.
محمود: تركت لك تعليقاً امس لكن يبدو انه لم يصل.
على العموم لقد كتبت لك انى مبسوطة بيك اووووىى بجد فرحانة علشانك جداً فرحانة اوى انك وصلت للنتيجة ديه.
انا كما اعتمادية و اخذت الطرفين التعلق الشديد و البعد عن الآخرين اعتقاداً منى انه علاج الاعتمادية مما زاد الأمر سوءاً للأننى رجعت مرة آخرى الى التعلق بصورة اشد من ذى قبل.
امضيت حوالى 15 عاماً فى اعتمادية مستمرة فى كل علاقاتى و لم افهم قط كيف اعالج منها.
المهم انى دلوقت الحمدلله ابتديت التعافى منها علشان كده انا مبسوطة بيك لأنى اعلم جيداً آلام الاعتمادية و ما تسببه لنا من جروح و ذل فى علاقتنا.
و كمان مبسوطة انك مثقف و تقرأ لباولو كويليو :)
الصديقه العزيزه البطله لمست فيا اوي نقطه انك حسيتي بألامي من الاعتماديه وانها بتسبب جراح كبيره جدا بجد انا مبسوط انك بتقدري تحسي باللي قدامك وده معني اننا اناس لازم نحس ببعض بجد سعيد جداااااااااااااااااااا بمعرفتك
و انا كمان يا محمود سعيدة بوجودك معانا :) الى الأمام يا همام
محمود .. حبيت اسلم و اقول ان ده بالظبط اللي حصل معايا .. و دلوقت انا سعيدة جدا بشفائي من الأعتمادية .. و بشجع نفسي عشان مكنش عندي مجموعة اتدرب فيها علي ده لكن حاولت من خلال القراءة و مساندتكم.
إرسال تعليق