ايديا في جيوبي

كنت هكتب بوست بعد اقل من شهر بعد ما كتبت وكتير استغربوا من كلمه قريبا جدا كنت هكتب بعدها عن سنه من التعافي بس اللي خلاني اكتب لما سمعت رباعيه ايديا في جيوبي للعبقري صلاح جاهين اللي كان لآسم جاهين دور مهم جداااااااااا في مساندتي في التعافي والرباعيه بصوت منييييييييييير وهيا في الاصل رباعيه من رباعيات عمنا صلاح جاهين ما علينا....المهم وانا بسمع الاغنيه وقفت عند كوبليه (وحدي لكن ونسان وماشي كده)ياااااااااااااه كان فين الاحساس ده من زمااااااااااااااان بعد معاناه طبعا قدرت اوصله مش معني كده اني ببعد عن الناس او التواصل معاهم بس اني احب وحدتي واستفاد منها حاجه بجد جميله ازاي ! هحكلكم

كان يا ما كان كان فيه واد اسمه محمود كان طفل زي اي طفل تاني بس كان حساس شويه زياده عن اللزوم ولما الزمان جه عليه انكمش جوه نفسه بعيد عن الدنيا والناس ولما كبر وهو لسه من جواه صغير ابتدي يدور علي نفسه وكان بيفتكر انه بيلاقي نفسه من خلال الناس من اعتماديه لل انتي عارفه الباقي علي رأي تهامي باشا في اعلان ميلودي افلام عربي ام الاجنبي...المهم الواد ده فضل لسه صغير في نظر نفسه وده كان شيئ صعب شويه ازاي هو شايف نفسه صغير وكل اللي حواليه شايفانه كبير قال يعني الواد فريد عصره واوانه بلا خيبه وفضل سنين طويله علي ده الحال لحد لما زهق وقرف من الدنيا واللي فيها ولان ربنا بيحبه قرر انه يساعده ووقف في طريقه ناس نضيفه بجد بتحبه وشيفاه فعلا انه كبير بجد مش مجامله وخلوه يحس بكده.ودخل العلاج ومر بمراحل كتيره وشاف ناس هما مش ناس عاديه دول ناس كويسه جدااااااااااا بيكون معاهم بيحس كأنه جوه نفسه بيتكلم عن نفسه من غير كدب ولا تبرير ولا تحسين لصورته او لبرستيجه قدامهم بيقدر يعبر عن اللي جواه بصراحه وبيقدر يطلع وجعه بره من غير ما حد يعيب عليه ولا يقول عليه كلمه وحشه (جروب الاتنين)طبعا الكل مش بيفهم او بيحس بمعانتي لان كل واحد فينا لييه معاناه وظروف مختلفه عن التاني بس زي ما الدكتور قال دايما اخد الرسايل الايجابيه وابعد عن الرسايل السلبيه والحياه عموما بتقول مش لازم كل الناس يا تبقي معايا يا تبقي ضدي .فيه ناس بتفهمني وافهمها وفيه ناس لا مش معني كده اني مش بحبهم او ضدهم او هما ضدي ...المهم محمود بعد مرور 11 شهر ودخوله في الشهر ال12 قدر يحس (وحدي لكن ونسان وماشي كده)قدر يحب نفسه قدر يتقبلها ويحترمها ويشوف قدراته وقدر كمان يخوض وبأصرار التواصل مع الدنيا مع الناس بحب مش عافيه وخوف زي زمان ..قدر يعمل حاجات لنفسه حاجات تخليه كبير وناضج في نظر نفسه وده الاهم ببقي ونسان لما بكون وحدي لما اقري كتاب وطبعا كتير عارفين ادماني للكتب اللي برضه ساعدتني في العلاج وكانت عامل مهم جدا او لما بروح التمرين وبركز علي نفسي او لما كمان بكون في الجروب وبتكلم عن نفسي او حاجات تانيه كتيير والاهم اني ابتديت احس بنفسي من جوه ومش محتاج من حد انه يقولي انت كذا او كذا ومبقتش اعتمادي علي حد تحررت اخيرااااااااااااااااااااا (ويا رب دايما) ودايما بقول (يا رب اللهم لا تولني غيرك)..او زي الاعلان اللي معلق في دماغي (ايوه كده يا وديع اخيرا فهمت)علي فكره المزه اللي فيه جامده جدآاااا وتستاهل تبقي نجمه الموسم وكل موسم.المهم استنوني في البوست اللي جاي وبرضه قريبا جدا وفيه موضوع مهم جدا عن سنه من التعافي...قريبا جدا. ااااااااااااخ نسيت الرباعيه

ايديا في جيوبي وقلبي طرب.........سارح في غربه بس مش مغترب

(وحدي لكن ونسان وماشي كده)........ببتعد معرفش او بقترب